Одоогоос 119 жилийн өмнө буюу 1901 оны арванхоёрдугаар сарын 5-нд  Америкийн кино найруулагч, зураач  Уолт Дисней (жинхэнэ нэр нь Уолтер Элайас) Чикаго хотноо төржээ. Тэрээр 18 настайгаасаа  шог зураач хийж эхэлсэн байна. Хожим өөрийн “Лаф-о-грамз” компанийг байгуулжээ. Тэр үеэр “Үнсгэлжин”, “Улаан малгайт” “Гуталт муур” зэрэг зурмал киног бүтээв. Уолт 22 настайгаасаа Холливудад ажиллах болжээ.  Бас энэ үеэр,“Алиса мультипликацийн оронд”, “Аз жаргалтай молтогчин Освальд” гэсэн хоёр төсөл дээр ажиллан  амьд жүжигчин  зурмал хүрээг хослуулсан байв. Тэрээр 1932 онд Микки Маусыг бүтээснийхээ төлөө Оскарын шагнал авч байлаа. Үүнээс жилийн дараа тэр  өнгөт зурмал киноны технологийг  эзэмшсэн байв.  “Гурван тоорой” киногоор тэр  хоёр дахь Оскараа 1933 онд  авчээ.

Уолт 1938 онд  өөрийн уран бүтээлдээ бүрэн хэмжээний зурмал киног анх удаагаа бүтээв. “Цасан гуа ба долоон одой” кино нь маш их алдартай байсан учир  түүнд гурав дахь Оскарыг авчрав. Дараалаад  бүрэн хэмжээний “Пиноккио”, “Зөгнөл”, “Дамбо” зэрэг кинонууд хийгдэв. Тэр “Бэмби”  киногоо 1942 онд бүтээжээ. Дэлхийн хоёрдугаар дайны үеэр Диснейн компани засгийн газрын захиалгаар  сурталчилгаа, зааварчлалын кинонууд дээр ажиллажээ.

Дайны дараа бүрэн хэмжээний “Үнсгэлжин”, “Алиса ид шидийн оронд”, “Питер Пэн”, “Леди ба тэнүүлч”, “Унтаж буй гуа бүсгүй”, “101 далматин”, “Мери Поппинз” зэрэг кинонуудыг бүтээв. Тавиад оны эхнээс Диснейн урлан зурмал киноноос гадна “Хүмүүс ба улс орон”, “Амьдралын адал явдал” зэрэг баримтат киног бүтээж эхэлжээ. Уолт Дисней уран бүтээлдээ нийт 29 Оскар авчээ. Мөн тэрээр Калифорнид Динснейлендыг” байгуулжээ. 

Уолтер Элиас Дисней бол АНУ-н хүүхэлдэйн киноны зураач, продюссэр, найруулагч, зохиолч, дуу оруулагч төдийгүй бизнесмэн юм. Ах Рой Диснейн хамт байгуулсан дэлхийд алдартай Уолт Дисней Компани нь өдгөө жилийн орлого нь 35 тэрбум доллар хүрэх олон улсын корпораци болон хөгжжээ

Архаг тамхичин байсан тэрээр уушгины хорт хавдраар 1966 онд Лос-Анжелес хотноо нас баржээ.